(10) 5. อุปาลิวคฺโค

1-2. กามโภคีสุตฺตาทิวณฺณนา

[91-92] ปญฺจมสฺส ปฐเม สาหเสนาติ สาหสิยกมฺเมนฯ ทุติเย ภยานีติ จิตฺตุตฺราสภยานิฯ เวรานีติ อกุสลเวรปุคฺคลเวรานิฯ อริโย จสฺส ญาโยติ สห วิปสฺสนาย มคฺโคฯ อิติ อิมสฺมิํ สติ อิทํ โหตีติ เอวํ อิมสฺมิํ อวิชฺชาทิเก การเณ สติ อิทํ สงฺขาราทิกํ ผลํ โหติฯ อิมสฺสุปฺปาทา อิทํ อุปฺปชฺชตีติ โย ยสฺส สหชาตปจฺจโย โหติ, ตสฺส อุปฺปาทา อิตรํ อุปฺปชฺชติ นามฯ อิมสฺมิํ อสตีติ อวิชฺชาทิเก การเณ อสติ สงฺขาราทิกํ ผลํ น โหติฯ อิมสฺส นิโรธาติ การณสฺส อปฺปวตฺติยา ผลสฺส อปฺปวตฺติ โหติฯ

3. กิํทิฏฺฐิกสุตฺตวณฺณนา

[93] ตติเย สณฺฐาเปสุนฺติ อิริยาปถมฺปิ วจนปถมฺปิ สณฺฐาเปสุํฯ อปฺปสทฺทวินีตาติ อปฺปสทฺเทน มตฺตภาณินา สตฺถารา วินีตาฯ ปรโตโฆสปจฺจยา วาติ ปรสฺส วา วจนการณาฯ เจตยิตาติ ปกปฺปิตาฯ มงฺกุภูตาติ โทมนสฺสปฺปตฺตา นิตฺเตชาฯ ปตฺตกฺขนฺธาติ ปติตกฺขนฺธาฯ สหธมฺเมนาติ สเหตุเกน การเณน วจเนนฯ